Teisteanas Dèanadas-lùtha - B
Thathar air Teisteanas dèanadas-lùtha (8KB pdf) a chur ri chèile dhan Phàrlamaid. Is e na tha san teisteanas seo sgrìobhainn a chuireas an cèill èifeachd togalaich mu lùth air a bonntachadh air mar a chaidh a thogail.
Tha seo ga thomhas le bhith a’ cur feum air bathar-bog coimpiutaireachd gus amhladh den togalach a chruthachadh. Am measg an fhiosrachaidh san amhladh tha cruinneadaireachd an togalaich, ìrean de lìneachadh agus de theasachadh agus siostaman-soillseachaidh. Tha ìrean a’ dol bho A, an ìre as èifeachdaiche gu G, an tè as ìsle. Fon ìre mu lùth, gabhaidh togalaichean a chur an coimeas a chèile air a bhonntachadh air pàtrain àbhaisteach.
Is e ìre na Pàrlamaid mu lùth B (8KB pdf).
Airson barrachd fiosrachaidh air teisteanasan-lùtha, tadhail air làrach-lìn Inbhean Togalaichean na h-Alba.
Duais Àrainneachdail - BREEAM
Chaidh sgrùdadh mionaideachd a thaobh na h-àrainneachd a dhèanamh air an togalach air fad a dhèanamh le Buidheann-rannsachaidh Thogalaichean, buidheann-comhairleachaidh neo-eisimeileach mun àrainneachd.
Chaidh na trì prìomh mhìrean den aitreabh (Togalach nam Ball, Taigh Queensberry agus Togalaichean an t-Seanaidh) a mheasadh “Barraichte” a thaobh dèanadas-àrainneachd fo Mhodh-measaidh na h-Àrainneachd aig Buidheann-rannsachaidh Thogalaichean. Rinn seo breitheanas air dealbhadh an togalaich sna raointean ceangailte ri slàinte is fallaineachd, lùth, còmhdhail, taghadh stuthan agus cleachdadh-uisge.
San roinn mu èic-eòlas san duais, thug Taigh an Ròid comharraidhean iomlan a-mach, stèidhichte air gnèithean dùthchasach air an cur air feadh an fhearainn, rud a chuir ri bith-eugsamhlachd.
Chaidh comharraidhean iomlan a bhuileach airson dealbhadh Thaigh an Ròid a tha càirdeil don ozone. Mar eisimpleir, chan eil ceimig a dh’fhalmhaicheas ozone ga cleachdadh san fhionnarachadh-àile chuibhrichte agus san stuth-smàlaidh.
Chaidh comharraidhean àrda a bhuileachadh cuideachd airson a bhith a’ cleachdadh an uisge gu seaghach air an làraich. Thathar a’ cleachdadh uisge bho thuill-thollaidh air an làraich, a chleachdte airson grùdaireachd anns an aimsir a dh’fhalbh, gus clòsaidean a shruthladh a-nis.
Chaidh duais àrd a thoirt do dh’oifisean nam Ball airson nan ìrean ìseal de bhrùchdadh carboin ris an robh dùil, ri linn an dealbhaidh a tha seaghach a thaobh lùtha. Thathar a’ cumail caitheamh-lùtha aig an ìre as ìsle le fionnarachadh is soillseachadh nàdarra nuair a ghabhas e dèanamh.
Chaidh creideas a thoirt cuideachd airson cumadh is aghaidh Thaigh Queensbury a ghleidheadh, agus cleachdadh stuth-leagail bho na togalaichean a b’ àbhaist a bhith air an làrach, a chaidh a chleachdadh mar lìonadh agus mar bhun-cruaidh.
Teas
Tha siostaman-teasachaidh agus uisge-teth na Pàrlamaid gu math èifeachdach agus tha fionnarachadh-àile ga chumail gu seòmraichean nam frithealaichean-IT, far an cleachdar an ìre as ìsle de dhà-ogsaid carboin. Sa chuid as motha de dh’àiteachan, seach fionnarachadh-àile, tha siostam sa mheadhan a’ cumail smachd air àireamh mhòr de dh’uinneagan a ghabhas fosgladh air an oidhche ri linn tìde bhlàth gus am fionnairich an togalach. Tha an siostam seo ga leasachadh le aonadan-làimhseachaidh.
Dealan
Thathar a’ ceannach an dealain gu lèir bho thùsan ath-nuadhachaidh mar innealan-gaoithe, cumhachd-uisge agus bith-stuth. Sa gheamhradh tha beagan dealain ga chruthachadh air an làraich le inneal sa bheil teas is cumhachd le chèile agus a bhios a’ losgadh gas nàdarra. Thathar a’ cleachdadh an teas a bharrachd mar theasachadh.
Bidh a’ Phàrlamaid a’ cleachdadh mu 5.6 millean kWh de dhealan sa bhliadhna. Thathar air seo a lùghdachadh 1 mhillean kWh sa bhliadhna bho chaidh an togalach fhosgladh. Tha mu 7,000 de lampaichean gan cleachdadh anns an togalach, às a bheil mu 800 nan LEDan sàr-èifeachdach a-nis.
Uisge
Tha tuill-thollaidh air an làraich a’ toirt seachad an uisge gu lèir air a bheil feum airson nan clòsaidean. Tha Buidheann-gnìomha Dìon Àrainneachd na h-Alba air cead a bhuileachadh air a’ Phàrlamaid gus am faodar uisge a tharraing a-mach às tuill-thollaidh.
Stuthan
Tha am fiodh gu lèir a thathar a' cleachdadh anns a' Phàrlamaid a' tighinn à àiteachan seasmhach iar an deagh rianachd. Ionnsaich barrachd mun stuth a thathar a’ cleachdadh anns na diofar thogalaichean.
Bidh a’ Phàrlamaid a’ dèanamh rianachd air stuthan a chleachdar am broinn an togalaich. Cleachdar a’ chuid as motha den phàipear bho sgudal air ath-chuairteachadh gu tur agus tha iomadh seòrsa suth leithid glainne, bòrd-cairte, crogain-deoch agus roidhleagan-clò ga ath-chuairteachadh.
Blàr-donn
Chaidh a’ Phàrlamaid a thogail air blàr-donn, far am biodh ionad-grùdaireachd na h-Alba is a’ Chaisteil Nuaidh bho shean, gus nach fheumar raon-uaithne a chleachdadh. Tha teachd na Pàrlamaid air cur ri bith-eugsamhlachd na làraich. Thathar air feur tearc is dùthchasach a gheibhear air Àrd air Suidhe a chur ann an raointean-fosgailte na Pàrlamaid. Faigh a-mach barrachd mun rannsachadh.
Còmhdhail
Chaidh a’ Phàrlamaid a dhealbhadh gus a chur air chomas nan uile a tha ag obair an seo siubhal gu obair gu seasmhach. Chan eil a’ Phàrlamaid ach cairteal na h-uarach de cheum bho phrìomh stèisean-rèile Dhùn Èideann agus tha Sràid a’ phrionnsa faisg air làimh, le cothrom air busaichean dhan a h-uile ceàrnaidh de Dhùn Èideann agus nas fhaide air falbh. Tha còrr is leth-cheud de dh’ealchainnean-rothar ann don luchd-obrach. Tha goireasan-frasaidh agus -atharrachaidh ann cuideachd. Tha ealchainnean-rothar an taobh a-muigh an togalaich airson luchd-tadhail cuideachd.
Tha Rothaireachd na h-Alba air a’ Phàrlamaid a mheasadh a thaobh goireasan-rothaireachd agus tha iad air teist a thoirt gun tug a’ Phàrlamaid a-mach na slatan-tomhais gus a bhith air aithneachadh mar ‘Fhastaidhear Càirdeil do Rothaireachd’. Chuir a' Phàrlamaid roimhpe ìre nan ionadan-pàrcaidh ann am broinn an aitreibh a chumail gu 66, 6 do dhràibhearan ciorramach nam measg. Tha seo an taca ri 240 de dh’ionadan-pàrcaidh air an robh cothrom nuair a bha Grùdairean na h-Alba is a’ Chaisteil Nuaidh air an làraich.
Poileasaidh-ceannaich Cùramach
Tha poileasaidh aig Buidheann Chorporra Pàrlamaid na h-Alba an droch bhuaidh air an àrainneachd a chumail aig an ìre as ìsle le bhith a’ tarraing a-mach obair-ceannaich ann am modh a tha cùramach mun àrainneachd.
Tha an àirneis a thathar a’ cleachdadh anns a’ Phàrlamaid na deagh eisimpleir den phoileasaidh seo ann an gnìomh. Tha am fiodh gu lèir a thathar a’ cleachdadh anns an àirneis a’ tighinn à coilltean seasmhach air an deagh rianachd mar an fheumalachd as lugha agus thathar a’ seachnadh a bhith a’ cleachdadh cròim agus leathair.