Fios naidheachd: Fiosrachadh mu chosgaisean BPA airson 2023/24 air fhoillseachadh air-loidhne

Oifigear Gàidhlig

Tha am fiosrachadh as ùire mu chosgaisean pàrlamaideach nam BPA air fad air fhoillseachadh air an eadar-lìon an-diugh.  Tha cosgaisean cairteil 4 bhon bhliadhna ionmhais 2023/24 a-nis rim faighinn air-loidhne tro ghoireas rannsachaidh stòr-dàta na Pàrlamaid.

Tha pàipear-ullachaidh a tha ag innse cosgaisean iomlan ceann-bliadhna air fhoillseachadh an-diugh cuideachd.

Is e £25,359,035 an àireamh iomlan airson na bliadhna ionmhais 2023/24. Is e àrdachadh de £1,891,082 no 8.06% a tha seo air figear co-chosmhail na bliadhna roimhe de £23,467,953.

Thuirt neach-labhairt Pàrlamaid na h-Alba:

“Mar a thachras gach bliadhna, is e tuarastalan luchd-obrach a’ chosgais as motha, le £20.60m a’ còmhdach cosnadh luchd-obrach ann an oifisean pàrlamaideach is ionadail BPA – sin 81.25% den chosgais iomlan.

“Tha an còrr a’ còmhdach cosgais ruith nan oifisean sin, siubhal, agus taic do cheannardan phàrtaidhean nach eil san riaghaltas.”

Thuirt an neach-labhairt cuideachd:

“Tha an t-àrdachadh 8.06% ann an cosgaisean mar thoradh air Clàr Prìsean Reic a’ ruith aig còrr is 13% san Fhaoilleach 2023, agus Cosnadh Cuibheasach Seachdaineach nas àirde na 5%.

Goireas rannsachaidh:


Chithear mion-fhiosrachadh mu chosgaisean BPA tro ghoireas rannsachaidh stòr-dàta na Pàrlamaid:

Rannsachadh Cosgaisean BPA Pàrlamaid na h-Alba

Pàipear-ullachaidh 2023/24:

Gheibhear pàipear-ullachaidh a tha a’ mìneachadh mion-fhiosrachadh mu chaiteachas iomlan airson 2023/24 an seo: 

Cosgaisean Iomlan airson na bliadhna ionmhais | Làrach-lìn Pàrlamaid na h-Alba

Fiosrachadh mu thuarastalan luchd-obrach BPA

Gheibhear fiosrachadh mu chosgaisean sgioba-obrach airson 2023/24 an seo:

Cosgaisean Luchd-obreach: 2023-24 | Làrach-lìn Pàrlamaid na h-Alba

Sgeama Cosgaisean BPA

Gheibhear tuilleadh fiosrachaidh mun Sgeama Chosgaisean an seo::

Rannsaich cosgaisean BPA | Làrach-lìn Pàrlamaid na h-Alba

Cosgaisean ann an cruth Open Data

Tha fiosrachadh mu chosgaisean ràitheil cuideachd air fhoillseachadh ann an cruth Open Data a tha inneal-leughte agus a leigeas leis an neach-cleachdaidh fiosrachadh amh a riaghladh agus ath-riochdachadh ann an diofar dhòighean.

Faodar faighinn gu na seataichean dàta tron ​​​​API againn no mar aon phasgan de mu 60-70MB a ghabhas luchdachadh a-nuas.

Tha cairtealan 1-3 airson 2023/24 rim faighinn mu thràth. Thoir fa-near: Bidh cairteal 4 ri fhaighinn ann an cruth open data bho Dhiluain 11 Samhain.

Duilleag dachaigh airson Open Data

https://data.parliament.scot/#/home 
 Ceangal gu na seataichean dàta a bhios sinn a’ foillseachadh:

https://data.parliament.scot/#/dataset

Comataidh an Ionmhais aig Taigh an Ròid “anabarrach draghail” mu dhòigh-obrach ro-innleachdail Riaghaltas na h-Alba a thaobh ionmhas poblach

Oifigear Gàidhlig

Buill na Comataidh ann an Oilthigh Dùn Dè

Tha Comataidh an Ionmhais agus Rianachd Phoblaich aig Pàrlamaid na h-Alba “anabarrach draghail” mu dhòigh-obrach ro-innleachdail Riaghaltas na h-Alba a thaobh ionmhas poblach. 

Anns an aithisg sgrùdaidh ro-bhuidseit aca a chaidh fhoillseachadh an-diugh, tha a’ chomataidh ag ràdh nach eil “mòran fianais idir” ann gu bheil dealbhadh ionmhasail meadhan-ùine agus fad-ùine a’ tachairt.

Ged a tha cuid de cho-dhùnaidhean na h-aithisge a’ togail dragh, tha a’ chomataidh a’ cur fàilte air adhartas o chionn ghoirid air prògram ath-leasachaidh seirbheis phoblaich Riaghaltas na h-Alba, ag ràdh gu bheil iad air am misneachadh leis a’ chuimse air dòighean-obrach bacaidh agus tràth-eadraiginn.

Tha a’ chomataidh cuideachd a’ cur fàilte air dealas Rùnaire an Ionmhais a bhith a’ beachdachadh air dè a bharrachd a ghabhas dèanamh gus taic a thoirt do rannsachadh agus leasachadh ann an oilthighean na h-Alba, le sùil ri innleachdas agus fàs eaconamach a bhrosnachadh.

Thuirt Neach-gairm Comataidh an Ionmhais is Rianachd Phoblaich, Coinneach Gibson:

“Tha dragh mòr air a’ chomataidh againn nach eil dòigh-obrach ro-innleachdail aig Riaghaltas na h-Alba airson ionmhas poblach na h-Alba a stiùireadh. Chan eil mòran fianais ann air dealbhadh ionmhasail meadhan-ùine agus fad-ùine. Tha buidseatadh bliadhna air bliadhna air a bhith a’ sìor fhàs dùbhlanach, le feum air smachdan èiginneach susbainteach anns gach aon de na trì bliadhnaichean a dh’fhalbh.

“Tuigidh sinn nach eil uiread sùbailteachd aig riaghaltasan tiomnaichte gus dèiligeadh ri ‘cùisean èiginn Ach, dh’fhaodadh mòran chùisean a thug buaidh air Buidseat 2024-25 – leithid rèiteachadh pàighidh nas àirde na bha dùil agus àrdachadh pàighidhean tèarainteachd shòisealta – a bhith air an ro-innse agus air an lasachadh nuair a chaidh am Buidseat a shuidheachadh san Dùbhlachd an-uiridh.

“Aig a’ char bu lugha, dh’fhaodadh planaichean a bhith air an cur an sàs a leigeadh le geallaidhean caiteachais a bhith ‘sùbailte’ gus dèiligeadh ri duilgheadasan fiosgail.

“Tha sinn cuideachd den bheachd nam biodh prìomh phàipearan ro-innleachd a’ coimhead nas fhaide na bliadhna – leithid na Ro-innleachd Ionmhais Meadhan-ùine, ath-bheachdachadh Plana Tasgadh Bun-structair, Ro-innleachd Cìse, agus planaichean ioma-bliadhna – air am foillseachadh nuair a chaidh an gealltainn bho thùs, bhiodh iad air dèanamh cinnteach gun robh Riaghaltas na h-Alba a’ beachdachadh air an dòigh-obrach mheadhan-ùine agus fad-ùine mar phàirt de phlanadh buidseit.

“Tha iomadh dàil air prìomh ro-innleachdan ionmhais a’ toirt a’ choltais nach eil an riaghaltas cinnteach mu na tha iad a’ dèanamh.

“Air an gabhail còmhla, tha na molaidhean san aithisg againn air an dealbhadh gus taic a thoirt do Riaghaltas na h-Alba ann a bhith a’ coileanadh dòigh-obrach fada nas ro-innleachdail agus nas eadar-cheangailte a thaobh riaghladh ionmhas na h-Alba. Tha sinn a’ cur ìmpidh air an riaghaltas gabhail riutha gu h-iomlan gus ar n-ionmhas a chur air stèidh tòrr nas seasmhaiche agus nas cinntiche.”

A thaobh ath-leasachadh seirbheis phoblaich, thuirt Mgr Gibson:

“Tha a’ chomataidh againn air ar misneachadh leis a’ chuimse air dòighean-obrach bacaidh is tràth-eadraiginn ann am prògram ath-leasachaidh seirbheis phoblaich Riaghaltas na h-Alba. 

“Tha sinn ag iarraidh air an riaghaltas beachdachadh air agus aithris a thoirt dhuinn air na buannachdan, na cunnartan agus na cosgaisean a dh’fhaodadh a bhith an lùib roinn ùr de chaiteachas poblach a chur an sàs airson caiteachas bacaidh, a chaidh innse dhuinn a stèidhicheas slat-tomhais agus a bheir cothrom sùil a chumail air tasgadh thar ùine. Bhiodh fàilte air leasachadh den leithid.”

Leugh an aithisg shlàn: Sgrùdadh Ro-bhuidseit 2025-26:  A’ riaghladh Ionmhas Poblach na h-Alba: Dòigh-obrach Ro-innleachdail

Fios naidheachd – Dìth aonta mu mhaoineachadh air cur ri dàil an A9 

Oifigear Gàidhlig

Chuir dìth aonta air an uiread agus an seòrsa maoineachaidh a bha ri fhaighinn gu mòr ris an adhbhar nach deach targaid 2025 airson dùblachadh an A9 a ruigsinn.  

Seo buil aithisg ùire bho Chomataidh Com-pàirteachadh Shaoranach agus Athchuingean Poblach Pàrlamaid na h-Alba. Tha an aithisg ag ràdh gu bheil a’ Chomataidh fhathast iomagaineach am bi maoineachadh ri fhaighinn nuair a bhios feum air gus an ceann-latha ùr ann an 2035 a choileanadh. 

Tha an aithisg mar thoradh air rannsachadh na Comataidh air dùblachadh an A9.  Bha an rannsachadh na phàirt de bheachdachadh na Comataidh air athchuinge PE1992 bho Laura Hansler a dh’iarr air Riaghaltas na h-Alba an gealladh a rinneadh ann an 2011 a chumail gus an A9 eadar Peairt agus Inbhir Nis a dhùblachadh. 

Fhad ‘s a bha a’ Chomataidh a’ beachdachadh, fhuair iad sgrìobhainnean bho Chòmhdhail Alba a sheall gun deach duilgheadasan a thogail grunn thursan thar grunn bhliadhnaichean, agus iad uile a’ cur ris a’ chunnart nach b’ urrainnear targaid 2025 a choileanadh. 

Tha àite Còmhdhail Alba sa phròiseact cuideachd air a bhith fo sgrùdadh. Cha robh e soilleir don Chomataidh càite an robh prògram dùblachaidh an A9 suidhichte ann am portfòlio phròiseactan nas fharsainge aig Còmhdhail Alba. 

Bha dragh ann cuideachd mun dìth conaltradh fosgailte agus dìth deasbaid air an taobh a-muigh mu na dùbhlain a bha ron phròiseact, cùisean a dh’fhaodadh misneachd a’ phobaill a lagachadh ann an comas na buidhne pròiseactan bun-structair mòra a lìbhrigeadh. 

Tha a’ Chomataidh a-nis ag iarraidh gun tèid dleastanas fosgarrachd a thoirt a-steach airson phròiseactan mòra gus am bi duilgheadasan air an nochdadh nas luaithe. 

A’ bruidhinn nuair a chaidh an aithisg a chur air bhog, thuirt Neach-gairm na Comataidh, Jackson Carlaw BPA: 

“Tha an A9 na phrìomh shlighe airson eaconamaidh agus turasachd na h-Alba. Ach chan ann a-mhàin airson eaconamaidh na h-Alba a tha dùblachadh an A9 cudromach ach airson sàbhailteachd nan uile a tha ga chleachdadh.  Tha cus dhaoine air am beatha a chall air an rathad seo agus tha smuaintean na Comataidh le teaghlaichean gach neach air an tàinig buaidh. 

“Tha e air fàs follaiseach don Chomataidh gu bheil dìth soilleireachd mu na tha ri fhaighinn de mhaoineachadh air ciallachadh nach deach am pròiseact seo a lìbhrigeadh, agus chan e a mhàin sin, ach gun do chuir e ri fàilligeadh fosgarrachd san fharsaingeachd mu na dùbhlain a tha ron phròiseact.  

Cha dèan seo a’ chùis idir dhaibhsan a tha a’ fuireach agus ag obair ann an ceann a tuath na h-Alba. Agus ged a dh’ainmich Rùnaire a’ Chaibineit ceann-latha ùr airson am pròiseact a chrìochnachadh, tha an dàil air an earrainn den A9 eadar An Tom Aitinn agus a’ Mhòigh a’ fàgail nach eil sinn cinnteach an deach dad ionnsachadh bho na thachair roimhe.”    

 Tha an aithisg cuideachd ag iarraidh gun tèid comataidh Pàrlamaid shònraichte a stèidheachadh gus sùil a chumail air prìomh phròiseactan bun-structair aig Riaghaltas na h-Alba, gu h-àraidh far a bheil na pròiseactan sin dualtach ruith thairis air grunn sheiseanan pàrlamaid. 

Thuirt an Neach-gairm cuideachd: 

“Tha a’ Chomataidh againn gu làidir den bheachd gum feum dleastanas fosgarrachd a bhith ann airson phròiseactan mòra mar seo, gus dèanamh cinnteach gu bheil a’ Phàrlamaid agus cuideachd am poball a’ faighinn fios mu adhartas.  

“Tha sinn cuideachd ag iarraidh gun tèid sgrùdadh pàrlamaideach ceart a dhèanamh tro chomataidh pàrlamaideach a stèidheachadh a dh’fhaodadh sùil a chumail air pròiseactan bun-structair mòra. Cuidichidh seo gus dèanamh cinnteach nach tèid na daoine a tha an eisimeil an A9 a dh’fhàilligeadh a-rithist.” 

Dh’iarr an Athchuinge cuideachd gun deigheadh carragh-cuimhne nàiseanta a chruthachadh dhan a h-uile duine a chaill am beatha air an A9. Tha a’ Chomataidh air iarraidh air Riaghaltas na h-Alba rannsachadh agus co-chomhairle a chumail mu roghainnean airson carragh-cuimhne iomchaidh. 

Cùl-fhiosrachadh 

Anns a’ Ghearran 2023, thòisich a’ Chomataidh Com-pàirteachadh Shaoranach agus Athchuingean Poblach a’ beachdachadh air athchuinge a tha ag iarraidh air Riaghaltas na h-Alba a ghealladh a rinneadh ann an 2011 a chumail gus an A9 eadar Peairt agus Inbhir Nis a dhùblachadh, sàbhailteachd rathaid a leasachadh air an t-slighe seo, agus beachdachadh air carragh-cuimhne nàiseanta a chruthachadh do na daoine a bhàsaich air an rathad.  

PE1992: Dùblaich an A9 agus leasaich sàbhailteachd rathaid 

Nuair a bha a’ Chomataidh a’ beachdachadh, chuala iad bho ghrunn luchd-fianais a’ gabhail a-steach seann Phrìomh Mhinistearan Ailig Salmond agus Nicola Sturgeon a bharrachd air grunn sheann Mhinistearan Còmhdhail. 

Gheibhear tuilleadh fiosrachaidh mu rannsachadh na Comataidh air duilleag rannsachaidh na Comataidh.